年又過年，又一城今日起至年三十晚，每日下午三、四同五點都有雜技表演，由內蒙古雜技團一班後生仔傾力演出，好似驚險嘅蹬人（即係人叠人再加凌空翻騰）、靈巧嘅連環拋波仔等等傳統雜技，陪港人迎接新正頭。
開講有話台上一分鐘，台下十年功，其實真係唔只十年㗎。八方噚日同其中兩位團員傾偈，有漢族大師兄亮亮、同鄂倫春族嘅莫日根，佢哋都係十歲八歲就加入雜技學校，每日六點就起身練功，中間經歷唔少辛酸。莫日根話，細個練空翻都驚㗎，一驚就易跌，跌到骨折兼傷膝。咪睇拋波仔好似冇咁傷，亮亮話每個落點、每次拋高都擔心失誤，不過佢都話：「既然選了這一行，就要愛這一行」，始終好享受喺舞台表演，聽觀眾嘅歡呼同掌聲。
佢哋呢十一年嚟走遍大江南北表演，遠至歐美澳洲都去過，每年只趁農曆新年返老家一次。掛唔掛住屋企呢？莫日根話出嚟咁多年，習慣啦，但講起老家，就好開心咁話老家係原始森林好靚好靚，一年有八個月係冬天，凍到零下攝氏四五十度，對比起嚟，香港嘅冬天好舒服，「氣候怡人」咁話！