早排中聯辦大搞親疏有別，只邀請個別泛民議員出席新春酒會，有花生友喺現場除留意多個「外國勢力」主腦，包括美國駐港總領事夏千福、英國駐港總領事吳若蘭都畀面現身，亦見經常狂插泛民嘅愛港之聲主席高達斌到場。
獲邀去中聯辦酒會，似乎係身份象徵，高達斌向花生友透露，自己至今出席過十幾次中聯辦酒會，包括八十年代被中聯辦以社區人士身份邀請出席，九五至九七年則用區事顧問身份獲邀，而今年出席完中聯辦新春酒會後，仲會再去中聯辦港島區酒會。咁鬼畀面，難怪獲阿爺愛錫。
既然同阿爺關係咁密切，嚟緊政改又有乜搞作？過去經常示威鬧泛民嘅高達斌話，「𠵱家政改我哋都要低調少少，畀嗰啲泛民考慮吓，因為唔想令佢哋冇面，要畀個空間佢哋落台」。佢話如果現時樣樣都鬥到咁絕，搞到泛民退無可退，政改只會更冇可能通過喎。佢仲分析，現時泛民點做都死，二月一日元旦遊行只有一萬人出嚟，連四、五萬都冇，反映阿爺喺佔領運動後「贏晒」喎。
難怪花生友聽聞，𠵱家連阿爺用嚟群眾鬥群眾嘅愛字堆，都「吹和風」話要暫時停工，君不見政制及內地事務局局長譚志源早排訪京後，透露京官對同泛民溝通持開放態度，似乎阿爺真係仲有心就通過政改同泛民溝通喎。
花生友