【本報訊】農曆新年期間，市民都會外出參與大型活動，但今年撞正流感高峯期，有廟宇準備口罩予入場人士，有年宵檔主怕影響叫賣拒戴口罩。家庭醫生則建議市民去完人多地方後應先更衣。
黃大仙祠每年農曆新年均吸引數以萬計善信參拜，嗇色園董事柯偉順表示，因應人群聚集會安排員工留意善信狀況，「如果進場見到善信有少少唔舒服，會準備口罩」。
防病毒黏在衣上
年宵檔主普遍不擔心銷情，認為流感無礙市民逛年宵。有檔主會妥善安排「睇檔」更表，避免拍檔因過勞而影響抵抗力，也會自備口罩，笑言聲嘶力竭叫賣時「口水唔好噴到人」。但亦有檔主怕影響叫賣效果，拒戴口罩，但會自備消毒酒精清潔雙手。
家庭醫生鄭志文指，黃大仙祠或年宵等屬流感傳播高危地方，「幾百人逼住你唔知隔壁左右有冇作病」，認為不論是否高危人士都應戴口罩，不要摸眼或鼻，避免感染環境中的病毒。他建議去完人多地方宜先回家洗澡更衣後再外出，以防流感病毒黏在衣服上。
■記者佘錦洪、陳沛冰