下星期就踏入羊年，Lulu預祝大家要「咩」有「咩」，羊年順順利利。啱啱嗰輪英超，最驚喜當然係巴神終於開齋。而曼聯贏波，竟然有兩球係來自前一場只係踢咗幾十秒嘅後衞基斯史摩寧，都係呢個星期嘅亮點。
講開曼聯，近來越來越多嘢講嘅史高斯，早排就雲高爾反擊艾拿迪斯一事，向呢位紅魔領隊講：「點解你要對韋斯咸主帥嘅言論有咁嘅反應？如果係車路士或者曼城主帥，情況會有啲唔同。考慮晒所有情況之後，你要知道，你係曼聯領隊。坦白講，我對呢件事感到好奇怪，因為對於艾拿迪斯嘅言論，我第一個感覺，就係好輕鬆、佢喺度講緊笑。」其實類似嘅抨擊，喺上年都出現過喺莫耶斯身上好多次，最後佢亦喺成績下滑、軍心不穩、高層唔信任嘅情況下被炒。
雲高爾謝絕講笑
寫到呢度，我開始明白點解雲高爾要對批評咁認真，因為史高斯口中嘅開玩笑，其實非常有殺傷力。上年對莫帥一浪接一浪般嘅評論，唔單止令球隊失去球迷嘅支持，更加令球員對佢出現信任危機。可能雲高爾睇得出英國傳媒對領隊可以帶嚟幾大威力，所以先對呢啲「玩笑式」嘅言論睇得咁認真。
下星期一曼聯會喺足總盃作客英甲球隊普雷斯頓，我估不論勝負，雲高爾都會繼續成為頭條人物。至於場波，兩隊實力差一截，加上曼聯無理由打斷自己贏波氣勢，今場贏波冇問題，可以贏3:0。
LULU
不懂踢波愛睇波