曼聯喺星期四公佈舊年十月至十二月嘅業績，由於冇歐聯踢，收入如預期下降，由前年同期嘅一億二千三百萬鎊（約十五億港元），跌咗14%到一億零六百萬鎊（約十三億港元），其中跌幅最大嘅範疇係轉播收入，同前年比少咗一大截，由四千七百萬鎊跌到得二千八百萬鎊左右。
行政總裁活華特就大派定心丸，話一切喺預料之中，同埋集團一直加強商業收益，盡力彌補失去歐聯轉播收入嘅問題。曼聯喺舊年最後三個月嘅商業收入比去年同期升咗近一成，有四千六百萬鎊。活華特仲對球隊成績有信心，可以喺下季重返歐聯，「雖然今季冇歐聯，但我哋嘅收入都仲好高，因為我哋重整營運模式，商業收入一年比一年多。球場上我哋嘅表現都非常好，正處於一個爭前四名嘅有利位置。」另外，曼聯嘅總負債升咗近百分之七，至約三億八千萬鎊；雲高爾（圖）今季送走唔少高薪球員，人工支出慳咗二百九十萬鎊。
史摩寧建奇功 3:1挫般尼
曼聯喺禮拜三都爭氣，主場以3:1贏咗般尼，排緊第三位。不過，我求大俠就覺得，𠵱家呢隊曼聯好鬼悶，紅魔呢場上半場陷於劣勢，係靠基斯史摩寧藉死球攻勢頂入兩球，半場先領先到2:1。換邊後，迪馬利亞博到十二碼，尹佩斯操刀射成3:1完場。曼聯仲有壞消息，戴利白蘭特同菲爾鍾斯傷出，其中後者傷勢都幾嚴重吓。
識睇，一定係睇足英台【英波Live】：
http://soccer.appledaily.com
http://bit.ly/engballlive