王國興向來都係立法會建制派嘅道具王，噚日佢介紹佢個新作品「強積柑」，其實係代表強積金嘅強積柑memo pad，要求政府取消強積金對沖機制，年初十會喺港島派發五千個。佢又話即使法例未做到，政府都應該帶頭做，例如規定承接政府合約嘅外判商要取消對沖機制。
佢仲應記者要求，去辦公室回顧昔日道具傑作，話所有製品都係佢十隻手指做出嚟，不過有啲就係其他團體示威時嘅物資，包括最著名為爭取傷殘人士享有乘車津貼而整嘅一隻染紅假腳，嚇親唔少人。當年佢仲用過一支紙製牙膏，入面放咗好多紙製樓宇，批評前特首曾蔭權喺房屋供應上「擠牙膏」。