呢個禮拜奇洛李維斯套《殺神》到咗，為愛犬炒起一個黑幫字頭，劇情膚淺得嚟口碑卻極佳，龍叔叔本來諗住冇腦轟番晚，點知落到灣仔碟舖昌哥度，佢話隻《單身男女2》忽然到貨。愛情片？龍叔叔麻麻咋喎。好死唔死呢日龍嫂跟埋嚟，身為千嬅死忠fans嘅佢，發咗癲話一定要煲呢隻，仲話就嚟係情人節，唔係仲打打殺殺呀？諗落又有啲道理喎。
杜琪峯加韋家輝，唔止得《槍火》、《放逐》呢啲男人戲好睇，懸疑片《神探》都拍出新意，賀歲笑片《嚦咕嚦咕新年財》，更係一班好友圍埋翻睇十幾次都仲識笑嘅經典。呢次玩愛情片，上集其實已經玩得幾盡，二男爭一女，都叫擦出唔少火花，賤男冇好報，好男人最終得勝。導演話覺得條橋未完，索性開拍第二集。仲有乜好搞？最佳辦法就係加多一條主線，由三角戀變成多角戀，五個人四條感情線，總之有咁複雜得咁複雜。新加入嘅楊千嬅，扮女股神冇乜說服力，不過成套戲不停被「後生版朝偉」周渝民放電。好似千嬅架拉利458成日泊街，又成日俾前後車貼實，周渝民多次出現打救，man到出汁。龍叔叔揸車唔算叻，睇嚟都要狂操窄位泊車，以備不時之需喇。
人多分薄戲份
奉勸一眾男士，同得身邊另一半睇呢類片，就預咗不停俾人話「你睇佢幾癡情！你睇佢幾細心！你睇佢幾識製做驚喜！」等等滋擾。影片內出現多幕冧女招數，好似戒指倒影變心形、蛋榚中藏戒指、估中女友唱乜歌等，幾老套都唔緊要，女人睇到一定冧到爆。不過周渝民越係做盡呢啲冧招，龍叔叔就越覺唔妥，大佬，點跟到咁多呀？好彩有個賤男古天樂平衡吓，成套戲扮情聖周圍媾女，簡直係女人公敵，女友自有「好彩你唔係咁咋」嘅覺悟。
由於人物及枝節太多，編排上難以顧及到，高圓圓同古天樂都叫有上集戲份backup，不過千嬅同古仔嘅感情線就顯得較薄弱，結局眾人力歇聲嘶要生要死，觀眾未必會投入到。雖然《單2》實在難以超越杜Sir另一經典《孤男寡女》，不過輕輕鬆兩粒鐘，情人節又懶得出街同人逼既話，算係唔錯嘅煲碟選擇。
7.1播靚歌冧到爆
杜Sir嘅戲未必套套啱睇，不過鏡頭、色彩運用必定賞心悅目，尤其拍愛情片，好多場景佈局同淺景深畫面，都帶出愛情美好嘅一面，BD碟畫面上亦都表現到呢種獨有美感。BD嘅聲軌同時收錄咗DTS-HD MA 7.1同杜比TrueHD 7.1，本以為愛情片冇乜聲效要求，不過幾幕拉利出現，又幾表達到嗰種V8引擎嘅聲浪，而且當背景播放陶喆嘅《愛很簡單》時，歌聲包圍全身，女友冧到變心形眼，勁陶醉囉。
龍叔叔簡介：
幾十歲老宅男，聽歌煲碟打機無一不癡，一生最大成就便是家中收藏幾千隻碟，假日只愛潛伏家中煲碟，親情跟愛情也拋諸碟後。
