中國名著《水滸傳》有所謂媾女五大條件：潘、鄧、驢、小、閒，潘者潘安也，即係靚仔，鄧即如鄧通咁有錢，驢代表體力，甚至包埋性能力，小為細心，閒就係好清閒。C朗基本上都具備潘鄧兩大條件，早前宣佈同俄羅斯女模艾琳娜情已逝，簡直係全球單身女士情人節前最佳消息；講真以C朗又靚仔又大隻，又搵到錢，筍盤程度簡直係AA+，打吡戰輸波後開P，C朗高歌一曲內容仲話好孤單好寂寞，真係搵鬼信。如果C朗開個招親大會，條龍應該可以由馬德里排到去莫斯科。
上一代足球壇嘅高富帥，一定非碧咸（圖）莫屬，佢比C朗更優勝之處，就係有埋小同閒；之前佢上清談節目，話自己𠵱家工作好似的士司機，一朝早就揸車帶四個仔女去唔同學校返學，下晝接放學之餘，又要送啲仔學踢波，有時搞到夜晚九點幾先「收工」，我唔知呢個世界上仲有冇靚仔得過碧咸嘅的士司機，但就肯定全球女性更加「葡萄」維多莉亞。
碧咸集合五大條件之餘，更重要係如緋聞絕緣體，基本上佢同維多莉亞拍拖到結婚，淨係衰過一次畀女助手盧絲；而且之前有雜誌比較碧咸同香港明星謝霆鋒，就話碧咸冇咩理自己萬人迷身份，就算有狗仔隊影住，都照樣抱仔孭女出街，簡直就係絕種好男人化身。
小弟都知本欄冇咩女球迷睇，不過如果有，就祝各位女球迷情人節搵到好似碧咸咁嘅好男友、好老公。
文：牽牛