鍾情在一眼，千里候信箋。聽日就係情人節，小弟代表本欄祝各位有情人終成眷屬。睇開球星啲花邊新聞，通常係偷食、召妓、送綠帽畀人，真係冇個好人咁。不過，球壇都有一啲值得分享嘅愛情故事，可以感動到我。
慧眼識賢妻，蘇亞雷斯（圖）喺大概十幾年前，佢仲係十五歲嗰陣，就識到十三歲嘅蘇菲亞，開始拍拖，從此佢嘅人生唔同晒。阿蘇話：「蘇菲亞令我醒一醒，自己要踢好足球。」拍拖冇耐，蘇菲亞就跟家人移民去歐洲，蘇亞雷斯好沮喪，但佢之後諗通咗，一定要踢好啲波，因為足球係佢去歐洲搵蘇菲亞嘅唯一方法。為咗重聚，阿蘇好努力咁練波。皇天不負情深漢子，佢喺十九歲嗰陣終於得到荷蘭球會格羅寧根嘅青睞，去到歐洲搵食。呢份令阿蘇上進嘅力量就係愛。
敏捷嘅走位，細膩嘅腳法，加埋精湛嘅射術，蘇亞雷斯已經係球壇其中一位最出色嘅射手。發掘阿蘇嘅球探都講過，如果冇蘇菲亞，相信阿蘇未必有咁大決心去歐洲。誇張啲講，愛情成就咗蘇亞雷斯。雖然𠵱家阿蘇有名有利，但從未聽過佢嘅桃色醜聞，一直安份守己做個好老公、好爸爸。阿蘇前年喺訪問中講過，蘇菲亞係佢最重要嘅教練同知己，「佢成日睇我踢波，見到我做得唔好，佢會不留情面話我，佢會話我做咩要同球證嗌交。蘇菲亞，多謝你。」
文：咖喱