今日年宵開幕，大把諷刺時弊嘅精品恭候大家，由民主黨設計、印有梁振英副尊容嘅廁紙，原本打算今年載譽歸來，繼續畀市民開大後專用，但早排俾內地查封，民主黨即時變陣，即時印製咗四千條「I'm just毛巾」畀市民抹地之用，條條印有梁振英個樣，諗住畀梁振英試吓食塵，每條賣三十八蚊，兩條賣六十八個半，回流香港製造。
送龍蝦紙模型
民主黨創意媒體部長黎敬瑋話，為咗畀市民向梁振英發洩，今年仲會送出以齊昕嘅母親梁唐青儀為主題嘅龍蝦坦克車摺紙模型。
工黨今年嘅主打精品，係印咗梁振英、林鄭、一哥、代表劉江華嘅垃圾桶同葉劉頭像嘅「替天行道」飛鏢靶，淨係得二百套，每套一百蚊。工黨主席李卓人話，產品能逃過內地審查，可能因為飛鏢靶上嘅官員惡搞樣唔太似真人。
工黨仲有其他產品包括「踩住689先」拖鞋、「撤回人大決定，否則隨街鳩嗚」同「真普選底線不容越過」紅黃警告旗，仲有印住「命運自主」嘅黃傘，每把賣一百蚊。