禮拜四朝早一開英國啲體育網站，我求大俠真係嚇咗嚇，以為生化危機襲地球，要執嘢走佬！兩年前俾蘇亞雷斯咬過嘅伊雲洛域，竟然喺禮拜三車路士贏愛華頓1:0場波疑似咬人。唔通阿蘇啲喪屍病毒傳染咗畀伊雲，到𠵱家先病發？
喺車路士主場對愛華頓嘅英超，踢到八十幾分鐘，雙方球員衝突，伊雲似乎走去勸交，拉開對手中場占士麥卡菲。不過，伊雲嘅動作都幾粗野吓，搵手箍住麥卡菲條頸，好似想勒死人咁。之後，伊雲咬牙切齒，一頭撞埋去麥卡菲條頸度，疑似咬咗人一啖。例如《每日郵報》等英國傳媒即刻話伊雲疑似咬人，有機會被英足總秋後算賬，停賽三場，傳媒仲翻炒番兩年前蘇亞雷斯咬伊雲單嘢出嚟。
俾阿蘇咬成經典
網民亦創意無限，就呢件事發表咗好多金句，例如話生化危機爆發嘞，蘇亞雷斯病毒會傳遍球壇；又有人話，食住花生等睇基亞連尼咬人，因為佢喺舊年世盃都俾阿蘇咬過。總之一講咬人，阿蘇躺着也中槍啦。亦有冷靜球迷翻查片段，睇真啲話伊雲其實冇咬人，只係用個頭頂人，批評英媒過份渲染。據當事人麥卡菲嘅友人透露，麥卡菲嗰陣膊頭的確感覺到有牙撞埋去，但佢唔信伊雲咬佢。
賽後，車路士領隊摩連奴拒絕回應任何有關伊雲嘅問題。首先有《英國廣播公司》記者問呢件事，摩佬話：「唔好引我笑啦！」之後就行開咗。去到記者會，摩佬更加講到明：「你哋再問呢啲，我就走人。」至於愛華頓領隊馬天尼斯就嬲到爆，認為伊雲應該被罰紅牌，「你哋睇到啲相，伊雲明顯做錯，呢啲行為係唔可以接受嘅。佢勒住麥卡菲條頸，非常粗暴，之後仲用頭頂人，而麥卡菲係冇任何還手動作。」呢場波火藥味相當濃，愛華頓有中場巴利完場前兩黃一紅被逐。摩佬賽後怒插巴利踢法粗野，球證應該上半場就要趕佢出場。
韋利安尾段入波贏1:0
除咗疑似咬人風波外，呢場比賽都有其他焦點，例如車路士喺冬季轉會窗簽返嚟嘅翼鋒古達度首次正選。戰情方面，都幾緊湊，兩隊門將施治同侯活都有神級發揮，其中施治救出盧卡古嘅近射，非常精采。去到八十九分鐘，車路士先靠韋利安打破僵局，以1:0擊敗愛華頓，繼續以七分優勢壓住同日贏波嘅曼城排榜首。
識睇，一定係睇足英台【英波Live】：
http://soccer.appledaily.com
http://bit.ly/engballlive