中國一方面批判西方思想，教育部長講明容不得西方價值觀滲透中國學校，但另方面又話要追上世界一級科技，究竟搞邊科？唔通科學家、科技專家只懂技術、並無思想？如果你信專制主義嗰一套，又好似係嘅，科學家只顧追求科學研究，政府肯撥錢資助，就會埋首在實驗室，那管得世間閒事及政府迫害人民，以言入罪。
納粹時期、蘇聯時期、毛澤東時期，德蘇中科學家大多如此，以為可憑科學救民族、科學救國，殊不知希特拉、史太林、毛澤東正在摧毀民族元氣，殘害國民。科學家有赤子之心報國，正是君子可以欺其方，獨裁政權對佢地以錢（研究經費）掩眼，盡情利用。最衰就係啲社會科學家啫，開口埋口講民權平等自由：食飽飯就寫文章評論時政，做「西方走狗」，故此老毛係要打殘佢地，送啲臭老九到農村淘糞。
美國賓夕凡尼亞大學做咗一個報告，將世界著名智庫排名，中國社會科學院名列全世界第二十七名，《人民日報》話中國急需加強智庫發展，幫助國家深化改革。但中國社會科學院邊度敢獨立思考，挑戰中央呀？做研究只不過係「找尋數據、事實」，所謂fact finding，從來不會以中央思維以外嘅方法嚟提供解決問題嘅方法，到了政治抉擇時刻，一定係寧左勿右緊貼中央嘅啦，邊敢惹禍上身噃。嗱，中國社科院敢唔敢公開批評教育部長袁貴仁思想極左，阻住中國進步呢？
據報中國科技企業如百度、阿里巴巴等因銀紙眾多，紛紛到美國矽谷開設科技研究中心，招聘當地科技精英（以華裔為主）為僱員，希望能在科技發展上有一日與蘋果、微軟等等爭一日長短。
但除非呢啲民企嘅中國老闆能夠擺脫馬克思思想，不理會袁貴仁的西方思想腐化腐蝕中國論，佢地是否能夠真正在美國矽谷開花結果，大有疑問。矽谷係真正思想百花齊放，百家爭鳴，用人唯才，絕不論資排輩嘅地方，新一代科技專家在網絡開放時代，絕非納粹時期之德國科學家困在實驗室為希特拉賣命嗰一代，全部係思想開放，追求個人自由嘅人物，與專制主義格格不入。中共忠心黨員袁貴仁呢類人阻住潮流轉，以1975年思維做2015年嘅教育部長，認真不合時宜。