急景殘年，每逢呢個時候，香港就會出現奇景，周圍撞口撞面都係拖篋人。奶粉、曲奇、朱古力同各式年貨乜乜乜固然搶手，但原來喺香港地，真係連遮瑕膏都可以賣到斷市。
港女同事敏敏話，早兩日佢去旺角IPSA個專櫃買嘢，貫徹佢向來厚多士作風，一路買一路同啲sales傾呢樣、問嗰樣，但其間不停有內地客過嚟問：「有冇嗰隻三色遮瑕膏（圖）？」sales姐姐次次都好有耐性咁答話：「唔好意思，賣晒，要遲啲先有貨。」對方惟有失望而回。據了解，好多內地客買嚟唔止自用，仲係代購，即係大批掃貨買返去轉賣。
費清孤陋寡聞，唔明點解遮瑕膏都要落香港買。奶粉就話毒奶粉陰影未除，唔敢畀BB食國產貨，學法官大人話係「國恥」箒。咁遮瑕膏買唔到呢隻可以買第二隻，照計唔使專程嚟掃㗎！
原來，呢個日本護膚化妝品牌喺北京、上海等大城市都有分店或專櫃，但喺華南地區，得福州有，連深圳、廣州都冇，所以最近都係來香港買。至於為何獨搶呢款遮瑕膏，就係因為有內地美容blogger在網上大讚，所以熱賣。據sales姐姐話，內地客好信blogger講啲嘢，佢哋點sell都冇用，blogger講一句好過佢哋講十句。
順帶一提，日元低水，好多日本貨都賣平咗；呢個牌子唔例外，好多產品都平咗幾十蚊喎。
費清 ＃要生計，也要生活 ＃毋忘初衷