假假哋憑「活力金剛」贏過香港打吡，練馬師蘇保羅呢排簡直橫掃馬圈，今晚憑落飛冷門「尚華盛甲」食完頭糊後，第六場三班1650米佢以2.2倍全熱門「連利之星」起孖攞威，後駒夥拍雷神連捷，仲要捧走埋扶輪百週年挑戰盃，台前幕後威上加威。
雷神跑完第六場已揸住四win，順序是「勝利威」、「回鄉更好」、「香江福星」及「連利之星」，累積48分提早勝出騎師王。「連利之星」轉跑谷草開晒竅，上仗四班一哩破處，今場跑高一班，姿態一樣咁輕鬆，已經連續五仗非冠即亞，蘇廐踏入2015年短短個半月已經贏咗12win，頭馬冷熱兼備，馬房氣勢銳不可當。
呢場拉士百幾米冷門「勇創潮流」在蘇狄雄胯下看似有機，不過始終威脅唔到「連利之星」，蘇狄雄28歲牛一正日做二奶，唔能夠贏馬賀壽，第三名由雷神棄騎「甜城效應」換田泰安攞到，第四名係梁家俊座騎「真慷慨」。三T正獎有人中，每注派373萬，中到可以過肥年。