唐崇正（MastaMic）的年度Rap Up踏入第七年，今年《14 HK Rap Up》下周一正式上載。花了兩個多三個月做資料搜集，曲長十八分鐘有多，是七年來最長，音樂氣氛有轉折，所以分Part A及Part B。
去年是香港的轉折年，許多人用不同方法記錄香港大大小小的歷史，而這個經常戴黑超的《頭條新聞》常客，兩年前因為說過一句：「唔好再鬧『蝗蟲』。」原意是提醒港人不要自貶品格，卻無端端被網民封為左膠。他仍堅持七年，目的只是一個，MastaMic說：「好多人話用音樂記錄香港，我諗冇任何音樂比我咁樣記錄香港更記錄香港啩，係咪先！我記錄到咁，你有邊隻歌記錄得多過我，你話我聽。好希望用我擅長嘅Hip Hop為香港做啲事，好等十年後聽番隻歌，等人可以記起香港發生過啲乜事。」
歌詞必寫雨傘運動
「其實Rap Up係好有趣嘅，你唔會成日聽住，一年最多聽一兩次。但每次聽完，你都會再想聽番過去一兩年，追溯番一啲本來好快消失嘅回憶。」二○一四年大事回顧，無論紅黃藍綠絲都肯定想起那遍地黃傘，五味雜陳，「近年香港有好多延續性新聞，好似講咗兩年嘅許仕仁案終於結尾、菲律賓人質事件叫做有所謂嘅道歉，如果唔寫雨傘運動，簡直等於冇寫。」翻開歌詞，關於雨傘運動的部份起碼佔三頁紙。MastaMic說：「『初次體會積累嘅勇氣，衷心問點解要敵視到如斯田地』，佔全曲兩分幾鐘，但其實我可以寫夠二十分鐘。」其他歌詞還有「成家做戲，假到咁我不禁倒抽一口梁氣」，輕鬆看，特首一家其實好有娛樂性。
令他更花時間的，是回顧了許多被人遺忘的香港人小故事。如為堅持四年制學制而不接受政府資助、一生經歷許多難關的樹仁大學校長鍾期榮；去年退休、一生手工修理雨傘的何洪希伯伯；石硤尾因氣體爆炸案殉職的消防隊目梁國基等等，「我覺得香港人好善忘，好多事消費完就算。好似深水埗明哥，舊年基本上已經冇人提，但呢啲先係真正香港核心價值。真嘅關愛唔係你設個基金講乜講物，而係就算你冇錢都肯落手落腳做。唔理你泛民定建制，有幾多個人好似佢咁落手落腳，連買餸都自己去做，雖然今次冇寫佢，但我會寫多啲呢啲小故事。」善忘，是香港人的通病，在這個新年，懂得回顧反思之餘落力實行，想是大家的共同課業。
記者：陳慧敏
攝影：譚建章