英超水浸喇！唔係講緊英格蘭有大雨，而係講英超周一公佈總額高達51.36億鎊（約六百億港元）嘅二○一六至二○一九年，三季賽事嘅國內轉播權，較上次合約大增七成。《天空電視台》就最進取，每季一百六十八場直播比賽投到當中一百二十六場，大部份係新增嘅周五同周日大戰，總額達四十一億鎊，其餘由《BT》分到，埋單計一計，平均每場轉播成本超過一千萬鎊，仲未計天空請亨利（中）、林柏特等星級講波佬嘅開支。
英國傳媒就話，水漲船高下，新嘅海外轉播權合約金額亦都大增，有大水喉支持下，一六至一七球季英超冠軍可以分到一億五千萬鎊，包尾嘅都分到九千九百萬鎊，夠晒子彈買球星啦。
不過就有估計，有良心嘅英超球會可能會凍結，甚至減番少少門票價格，叫做幫補吓忠心球迷啦。
識睇，一定係睇足英台【英波Live】：
http://soccer.appledaily.com
http://bit.ly/engballlive