原來勇武嘅「慈母」亦會軍心渙散，需要有人幫佢哋鞏固凝聚力同團隊精神！今期《警聲》報道，為咗答謝所有警隊成員喺持續七十九日嘅Operation SOLARPEAK中嘅貢獻，警務處處長曾偉雄同所有首長級高層，上月五號開始走訪各總區搞致謝會。
搞正向工作坊教感恩
最終一哥出席咗七場「勞軍」活動，唔知唱得兩嘴嘅佢有冇即席獻唱答謝夥計，只知佢人之常情地同手足齊齊大合照。
一哥走足七場之時，首長級高層就出席咗二十三場致謝會，同超過七千三百名人員齊歡唱、同慶賀，就連保安局局長黎棟國、副局長李家超同常秘羅智光，都出席咗其中兩場。
據報一哥向手足畀like之時，話今次佔領運動係香港自六十年代發生暴動後，警隊要面對其中一個最具挑戰嘅時刻，好在大家都成功跨越喎。
原來警隊亦喺一月五號至二月六號，搞咗一百五十場正向工作坊，有超過六千三百名參加過Operation SOLARPEAK嘅人員出席。呢啲工作坊原來想「鞏固人員在行動期間建立的凝聚力和團隊精神，以及協助他們以正向心態處理在行動期間的負面感受或情緒」；警察臨床心理學家則喺工作坊教大家「以感恩的態度作為心理上的工具去克服困境」，希望參加者可以「從經歷艱難考驗後體現正面的意義，建立抗逆力，面對逆境，並能好好裝備自己，迎接未來的挑戰」，聽落都啱晒雨傘世代共勉之！
李八方
mailto:[email protected]