農曆新年將至，唔少立法會議員已經好有放假心情，一早計劃好收爐後要去旅行休息吓。好似民主黨單仲偕大年初一就會飛去吉隆坡，飲飲食食兼打golf，到年初五先返香港，最重要一點係佢此行同太太揀咗搭馬航。嘩，馬航接連發生意外，震驚全球，單雞兩公婆都算藝高人膽大咯。
單雞解釋，張機票查實一年前已經買咗，當時都未出意外囉。佢見兩張機票夾埋都係五千五百蚊左右，而且又就啱係紅日假期，立法會冇會開，所以貪平就買定先，點估到會出事吖。不過佢就唔太擔心，仲話朋友之後喺另一航空公司出機票，足足貴一倍，單係呢樣都令佢笑番晒。
新民黨葉劉淑儀則會趁新年紅假，一個人到離島靜修睇書，暫別塵世，其中會睇一部好多官員都睇嘅《群書治要》，呢輯書係講治國安邦，唔通為選特首做準備？八方未問完，葉劉已經話「唔係」，話八方諗歪咗。