雨傘運動清場後陸續有參與者出書，今次輪到「佔中死士」邵家臻。佔中三子順理成章孭「序」上身，其中陳健民踢爆邵家臻唔聽話，佔中仝人自首嗰陣公開勸退學生，雖然心繫運動，都咬緊牙關堅決唔返佔領區，但邵家臻始終忍唔住偷偷哋返去佔領，事後陳健民覺得民主運動正係需要邵家臻呢種真誠嘅人。戴耀廷個序就肉麻啲，話邵家臻開會嗰陣形容戴耀廷似足超人咁底褲着喺面，即係心裏面嘅嘢寫晒喺塊面度，覺得邵家臻係世上少有認識得佢咁深嘅男人。
新書叫做《佔中，我識條鐵》，封面係邵家臻做大台咪手滴晒汗嘅插畫。本書細數佢喺佔領期間腳傷入院同做咪手嘅辛酸，邵家臻形容呢本書充滿眼淚。書入面有個「冇立場、冇情感、冇結論」嘅邵家臻版「民情報告」，以日誌形式記錄佔領點滴。