有情人終成眷屬，冇情人都唔使匿埋屋企打雀局。事關今個情人節周末，有南華同東方兩大球會陪大家；前者有球星喺鬧市派玫瑰，而東方則有打氣Angels親手打造嘅貼身禮物派畀球迷會會員，保證大家過一個sweet sweet情人節！
人夫歷格斯一支公過節
今年全勝嘅港超一哥東方，嚟緊星期日將會喺九龍灣公園球場上演嘅聯賽盃負方決賽，同黃大仙爭最後一張四強入場券。為咗球迷都可以同球隊一齊迎接新年同分享情人節喜悅，入場球迷除可獲得精美利是封外，一班靚靚打氣Angels，仲特別準備咗神秘禮物，送畀球迷會會員；唔知會係朱古力、「天使之吻」定係貼身用品呢？聽講即場加入球迷會，都有神秘禮物收㗎。
不過，東方一如以往賽前一日要集宿備戰，即係情人節當日，球員唔可以陪老婆仔女。綽號孖指嘅中堅梁國威話，已有計劃同靚靚老婆Fiona慶祝：「應該會預早喺情人節前一日同老婆撐枱腳，而今年特別之處係唔會買禮物畀佢，大家亦都有共識，就係買定禮物畀未出世嘅BB。」至於上場對天行元朗，取得喺港超首個入球嘅前英超兵歷格斯（小圖），雖然都係一支公過，但送完飛吻畀「粉絲」後，亦都好識「出口術」冧老婆：「我係大情人，日日都係情人節，冇乜特別。老婆同囝囝下個月先嚟到香港，所以情人節我要一個人過，我又唔鍾意飲酒，唔會去蘭桂坊喇，香港女仔同其他地方一樣，有靚有唔靚，但我都唔會望一眼。」
南華型男派玫瑰
今個禮拜冇波踢嘅南華都唔輸蝕，特別喺情人節當日，搵嚟隊長陳偉豪、陳肇麒同謝家強等十三個少林兵，兵分兩路去觀塘apm同銅鑼灣Sogo，派玫瑰畀女球迷應節；男球迷帶女伴去呢兩個地方拍拖，唔使錢都可以借花敬佛！至於單身嘅球迷亦唔使失望，事關少林寺都準備咗足球紀念品送畀大家，為大年初一喺大球場上演對紐約宇宙嘅賀歲盃造勢。
識睇，一定係睇足英台【英波Live】：
http://soccer.appledaily.com
http://bit.ly/engballlive