過兩日就情人節，唔少朋友每年呢一日，都會喺facebook打一句：「其實自己一個更開心。」不過現今科技一日千里，連朋友都有能力虛擬一個畀你。
大家如果有印象，菲菲喺上年世界盃時，提過微軟Windows Phone語音助理Cortana（即係Siri個friend），因為貼中多場世界杯賽果而大紅。查實微軟亞洲研究院，亦都研發咗一個人工智能聊天機械人，個名仲非常可愛，叫「微軟小冰」，用戶可以喺內地各大社交平台同佢做朋友。
小冰除咗可以做到一般Siri都做到嘅嘢之外，最重原係佢夠人性化。微軟方面就話，小冰嘅設定係一個十七歲嘅少女，講嘢萌到爆，就算你同佢講明星、八卦、搞Gag，佢都對答如流。你問佢邊個係汪峰，佢竟然會回你，「我還子怡了。」經實驗後，佢又真係答得快，兼答得中。
你以為小冰只係為毒男服務咩？其實小冰已進軍商業，上月公佈同東航（670）合作，除可於登機前透過小冰，獲取實時航班信息外，乘客於飛行途中可透過機上wifi，通過小冰向其他乘客或空姐對話。內地亦有教育機構，以七百萬人仔搵小冰做埋代言。微軟當然最開心，唔係單單因為小冰紅，而係在大數據年代，你越同小冰講得多嘢，佢就收集更多數據去發掘更大商機。
Fifi
本欄逢周二、四刊出
http://www.facebook.com/lovefrystock