𠵱家循港島區直選嘅立法會議員工聯會王國興，明年可能接替吸票機器陳婉嫻轉戰超級區議會。八方聽聞，工記東區區議員陳靄群或者會讓路，做王國興轉戰嘅踏腳石。
有工記中人透露，陳靄群年紀有番咁上下，退都係好應該嘅，王國興若然要選，呢個位都好適合。咁退咗落嚟之後，陳靄群有乜好撈？該工記中人話，雖然冇明文規定，但工記咁大，要搵個位安置人，又有乜難度？大家心照啦！
八方噚日就此問王國興，佢好行貨咁話，暫時未有考慮轉戰超級區議會呢個問題，一切聽從工記指揮喎。
另有說法話下屆立法會九西增加一席，不如由王國興頂上。對此王國興居然笑笑口話自己都轉戰咗唔同區好多次，冇計啦，牛年出世係牛命咁話喎。