內地有傳媒爆料，美銀美林首席經濟學家陸挺將會過檔去內地券商華泰證券。筆者致電美林，對方就唔肯確認消息真定假。內地券商去年賺大錢，待遇拍得住美資大行一啲都唔出奇。筆者有朋友去年喺上海一間券商返工，佢話按現時行情，一個三至五年經驗的分析師年薪一般都有兩百萬人仔以上，首席分析師通常超過八位數字，絕對係打工皇帝。
A股市值已經全球第二，又有大把新股上市，錢景無限。不過，香港人要入行一啲都唔容易。據朋友話，想要有咁高人工，一定要有關係，例如做行業分析師，就要同各上市公司高層有交情，可以索到內幕消息；做策略分析師，就要可以隨時同證監、銀監高層傾到偈。
內地證券分析師通常唔會係財經出身，多數係行業專家，人面廣；而宏觀策略師就多數來自政府部門或者人行。唔識睇財務報表？唔緊要。公司會再請有財經底的人，專門砌model寫報告。老實講，呢啲嘢喺A股冇人重視，亦唔值錢。
筆者的朋友就係專門幫人做model，雖然人工已經遠超以前喺香港投行打工，但同土炮分析師仲差一大截。今年初，佢終於辭職，下海搞私募基金去咗搵真銀。
李可強