零售業表現認真麻麻，唔少中國大媽勒緊荷包，搞到珠寶商冇啖好食。謝瑞麟（417）副行政總裁陳立業承認，今年派嘅花紅、人工加幅，都冇上年咁高，主要因為銷售表現唔算好；但公司特別畀員工放多一日「周年假」，希望大家收貨喇。
謝瑞麟上年第一次引入「生日假」，畀全體上下員工，每年多一日假期。陳立業話，謝瑞麟一直賣緊嘅鑽飾產品，非常強調結婚或各類周年紀念，為將呢個文化帶畀員工，今年再加一日周年假，已婚員工可以喺結婚月份自選一日假；未婚嘅就可以喺入職月份多放一日假。
對員工好啲之外，謝瑞麟亦諗計搵生意。陳立業話，佢哋會記低幫襯買結婚戒指嘅客仔資料，尤其係佢哋嘅結婚日子，謝瑞麟員工每個月頭就翻查記錄，「溫馨提示」男性客人紀念日就到，希望吸引佢哋再幫襯。