一檔馬旺開有條路，第三口孖寶冇佢哋冇錢收。繼第三場一檔馬「回鄉更好」配雷神掄元後，第四場四班千二米潘頓策「秋月春風」有樣學樣，一檔起步沿途有遮擋慳位跑，拉士一衝過晒，呢匹曾經六次於沙田一千米直路賽跑第二而未勝之馬，今勻首次渡江加上季內首配潘頓，處女馬終於開齋，造就馬主劉子邦與麥慶龍初次拉頭馬，唔知練馬師沈集成係咪眼部不適，抑或「秋月春風」望穿秋水獲勝令他有點感動，賽後見沈集成眼泛淚光，鐵漢也有柔情一面。
今場「醉中意」就冇「秋月春風」咁好彩，除防沙罩加眼罩，直路貼欄走甩晒以為贏得，點知臨門幾步畀「秋月春風」冚過輸短距離做阿二，已經係季內第二次，三歲拍賣馬仲未識贏。三、四名乃「春意溢然」同「佳音」，後駒着啡燈跑第四，落飛黨WP齊失重傷，至少放低咗幾百萬。
沈集成指「秋月春風」之前跑了六場亞軍，今仗終於出頭，可能此馬在谷草更啱衝，加上勁敵「醉中意」檔位比「秋月春風」外，有點優勢。不過下仗升上三班潘頓多數造不到磅，又要為騎師配搭煩惱。