你睇，羊年嚟喇！連叮噹都要讓路？（我知，佢叫多啦A夢，你畀我叫叮噹啦）原來因為農曆年，銅鑼灣希慎廣場叮噹Pop-up store獨家嘅叮噹豆沙包，提早收爐，賣埋今日就冇喇！
#人手製 考工夫
每日限量六十個、每個廿五蚊嘅叮噹豆沙包，二月三日起喺Pop-up store首賣，幾乎日日秒殺。不過，負責人SK話，呢個包其實係由大班麵包西餅師傅整嘅，因為造型特別唔可以用機器，師傅每日都要用人手整，好考工夫㗎。但年近歲晚，師傅們要歸隊整糕，所以叮噹豆沙包要提早停售，今日（二月十一日）係最後一日供應，如期早上十一點開售。
SK話，日本只係賣過叮噹蒸包，雖然賣過一百萬隻，但因為蒸出嚟個樣有啲會變形，所以香港就決定做麵包。師傅試咗好多次，最初隻叮噹係紫色㗎（費清睇過啲相，嚇咗一跳！），而貓眼原本係朱古力，但唔靚，最後要用麵包整……
粉絲都好失望，希望大班喺店舖賣。不過，據講個包好花工夫，唔係咁易有得賣。題外話，可能近朱者赤，因Pop-up store成日見報嘅SK越來越似叮噹，可能係時候節食。
費清 ＃要生計，也要生活 ＃毋忘初衷