一直被指為《鐵甲奇俠》現實版嘅Tesla老闆馬斯克（Elon Musk）可能遇到勁敵呀！市場傳出，做開消費科技產品嘅蘋果公司，設計無極限，最新動作係想挑戰做電動車嘅Tesla，研發自動駕駛車。
市場上個月傳過，一架由蘋果登記嘅神秘Van仔，可能係配備自動駕駛裝置。新近又有蘋果員工爆料，指蘋果最新嘅項目將會令人興奮，仲可能會改變業界，挑戰Tesla嘅地位。
口痕友分析，如果蘋果真係研發汽車，就同公司嘅核心業務差太遠，所以可能只係研究緊車用智能系統CarPlay嘅升級版，可以放喺架車度作娛樂，更可以利用iPhone駕駛。
蘋果早前已挖走咗Tesla五十名員工，Tesla又搶咗蘋果一百五十名員工，兩間公司爭到出晒面，即管睇吓馬斯克有乜奇招抗蘋果嘞。