股票分析師M約吃飯，話明請食齋，因為佢係素食主義者，一定不吃肉。但在約會之日嘅上午，突然有毛毛細雨，搞到中環地濕路滑，左丁山落斜路，幾乎PK撻直，好彩坐低地下之後，還可以即刻企番起身，唔使附近一位女士幫手。於是心念一動。諗起食齋地點在麥當勞道花園道交界，行上去條斜路係幾難行嘅，搵的士又未必有把握，於是要求分析師M改地方，改由左丁山請佢食素菜。分析師M一聲OK後，就叫秘書周圍打電話訂位，點知間間話新年將至，生意好好，對唔住嘞！點好呢，諗起老地方，陸羽，地下廳回覆十二時就有位，一時後恕難招待。
啱晒啦，分析員現在吃飯時間要遷就股市開市收市時段，午飯時間正好就是十二點到一點。兩人到陸羽地下卡位坐低，叫一碟羅漢齋豆腐，一碟水浸豆苗，兩碗白飯，分析師M係咁讚好味。好就好嘞，寡啲啩，左丁山自己就叫多一碟鮮牛肉燒賣送飯，始終難以全程食齋也。甜品就要桂花生蹄糕與蓮蓉糭，分析師M又係食到抹抹嘴。
返到寫字樓，管理員話有人送來新年糕點，打開手抽一睇，乃May姐年糕系列之兩款：家鄉芋頭糕甘蔗馬蹄糕。下午又有大坑李太送來一底蘿蔔糕。是晚與天真許，碌曾，總編P吃完吹水晚飯之後，返到屋企，心念一動，請左太下廚煎糕，一試口味，May姐當然係名牌，佢炮製嘅曲奇，早已賣到街知巷聞，今年實行進軍新年糕點，有精緻環保真空包裝，好有賣點。但最緊要係好唔好食嘅箒，芋頭糕味道夠濃郁豐腴，甘蔗馬蹄糕甜味適中，太甜就會嚇怕人啦，馬蹄加甘蔗汁，甜味渾然天成，啱啱好，與陸羽嘅桂花生蹄糕各擅勝場，May姐果然夠Pro，捉到晒大眾食客口味。May姐年糕系列係有得賣嘅，今年推出蘿蔔糕、芋頭糕、馬蹄糕、椰汁年糕，在崇光、永安、city'super有售。吃完之後，意猶未盡，食大坑李太蘿蔔糕，係李太私人homemade傑作，平時李太去佛堂做義工煮齋俾百幾人食，過年就在家秘製蘿蔔糕送俾親友，今年佢送一底俾左丁山試吓，一食便知難得一見，美味滋味，幾乎食上癮，搞到左太冇得食。唯一可講嘅係味道稍淡，後來李太回應話佢唔想落雞粉，刻意少鹽以符少鹹少甜之健康宗旨，佢話用隻台灣黑鼎鍋煎淡味蘿蔔糕，再配上余均益同吃就無以尚之。
（按：關於太歲牌一事，因來郵求買之電郵太多，而本欄並非「網購」，恕難應命，謹此致歉。）