西班牙傳媒嘅報道真係仲精采過三色台啲劇，上個月套巴塞隆拿宮廷鬥爭大結局，今個月就到皇家馬德里嘅明爭暗鬥上映。《馬卡報》爆料，皇馬會長佩雷斯喺B隊教練施丹嘅陪同下，禮拜一好似皇帝出巡咁，浩浩蕩蕩去到訓練基地，暗斥基斯坦奴朗拿度（C朗）輸波都開P，仲向教練安察洛堤訓話咗成個鐘！
生日相流出觸怒高層
皇馬上星期六俾馬德里體育會大炒4:0，今季六次馬德里打吡都未贏過，本身呢個賽果已經令佩雷斯等皇馬高層好不滿，C朗仲唔識死，賽後嗰晚仲高調咁開30歲生日P，占士洛迪古斯、馬些路等都有去捧場，搞到佩雷斯震怒！皇馬高層之前講明，C朗可以開P，但一定唔可以張揚，絕對唔可以畀啲相流出。最後，C朗達唔到要求，全世界都見到C朗喺生日會度載歌載舞。
星期一下晝嘅皇馬操練就精采囉，佩雷斯嬲到爆咁，同施丹去到訓練基地踩安察洛堤場。就好似一個大將軍喺軍營練兵，突然皇帝現身，訓斥兵將。佩雷斯開場首先講啲老土嘢，叫大家要團結；但佢話鋒一轉，要求球員喺私生活方面收斂少少，即係擺明畀說話C朗聽啦。
向肥安訓話一粒鐘
同班球員講咗一陣之後，佩雷斯就捉安察洛堤同助教希亞路入房慢慢傾，仲講咗成個鐘。佩雷斯要安帥帶番隊波連贏廿幾場，就好似上年年尾咁，同埋叫安帥好好睇住班球員！而西班牙《每日體育報》仲話，安帥個位已經危危乎，再有差池隨時被炒。咁邊個接手？當然係企喺佩雷斯側邊嘅親信施丹啦！喺球壇，安察洛堤已經係最有服侍大老闆經驗嘅教練，之前湊過貝盧斯科尼同阿巴莫域治，我求大俠希望安帥可以「耍太極」，化解到呢場危機啦！
另外，對馬體會時傷出嘅德國中場基迪拉原來都幾嚴重，係拉傷腿筋，嚟緊要養傷三個星期。皇馬原本都已經有幾多傷兵，例如占士洛迪古斯、沙治奧拉莫斯同莫迪歷等。
識睇，一定係睇足英台【英波Live】：
http://soccer.appledaily.com
http://bit.ly/engballlive