中環人成日搭的士，又知唔知call的市場好燒錢呢？來自美國嘅Uber今日在港搞免費的士日，畀用戶搭兩程免費的士，每程補貼上限二百蚊。阿里巴巴主席馬雲有份投資嘅快的Taxi即出招，向的士司機補貼每程十八蚊，叫的士大佬今日唔好幫Uber手。
Uber係第二次搞免費的士日，上次針對客貨Van，今次就係的士，唔知下次會唔會商務車都有份呢？不過，一向唔公開營運數據嘅Uber，噚日就畀一班行家串，潑冷水話佢哋的士勁少，根本搞唔起。
除咗快的Taxi，本地薑香港Taxi嘅聯合創辦人Kay Lui都睇死Uber，話Uber最多得二百架的士，估佢遲早要撤出香港市場。佢又向馬雲嘅快的Taxi發炮，質疑佢哋誇大數據，冇可能每日有兩萬宗柯打喎。