【估佢唔到】
齊昕新片傳聞叫《男極探射燈》（雖然記者會上戲名被遮住咗），戲名咁引人入性……唔係，係入勝至真，故事講乜東東？八方知道答案覺得好反高潮，原來係諷刺時弊同政府。聽聞呢套戲講述齊昕飾演嘅愛心社工，同飾演狗仔隊嘅李逸朗（Don）做情侶，到底點樣帶出時事？主辦單位梗係賣關子唔講住，只透露兩個人嘅片酬同樣有六位數，套戲下月開拍，暫定全部香港取景。
可以同特首千金同場做戲，阿Don嘅經理人都話：「阿Don好驚喜，完全冇諗過。」佢話劉導演吩咐咗阿Don要畀心機做戲，千祈唔好對女主角胡思亂想。
有傳陳惠敏會飾演齊昕嘅父親，陳惠敏噚日接受電話訪問時反問：「係唔係真呀？」問佢期唔期待同齊昕合作？惠敏叔就話：「咁佢都靚女，都有睇頭。」但自爆仲未簽約：「今（噚）日先搵我。」落實演出嘅樓南光就話，知道特首女有份參演都好愕然，估唔到佢嚟真。