各大小傳媒噚日晏晝三點鐘，突然收到三寶影視文化公司同趙氏天下影視傳媒嘅即日邀請通告，話六點半喺沙田一個工業中心臨時召開電影記者會。本來小事一樁，但女主角竟然係特首梁振英個女梁齊昕！風頭躉齊昕上大銀幕，傳媒點會唔關注？未夠六點，已經有半百記者到場、逾十架採訪車喺樓下守候，可惜最後大家白走一場，因為齊昕未拍戲已失場，聲稱因事難以亮相。
導演指「行路有問題」
喺記者會現場，有一塊大黑布印咗電影資料，大大隻字見到齊昕個名，但傳聞有份拍嘅陳惠敏同曹查理個名就遮住，相信同兩人未簽約有關，男主角則係近日憑「哭腔」唱《儍女》唱到街知巷聞嘅李逸朗。
記者會開始前，電影導演劉俊輝肯肯定齊昕嚟緊：「佢答應咗，個幾月前仲簽埋約！」佢大讚齊昕有演戲細胞，唔擔心齊昕父母搵上門：「見到（梁振英）就請佢食飯，見到（梁唐青儀）就請佢飲茶！」佢力撐齊昕係成年人，唔使吓吓問老竇意見：「我拍戲之嘛，理得乜嘢背景，娛樂觀眾之嘛。同佢試咗戲畀稿佢讀，唔OK都唔要佢。」
之不過等到七點二十分齊昕仲未到，記者會開始先，司儀喺台上問戲名係咪叫《男極探射燈》時，劉導演話：「問過律師，呢個名有爭拗，所以暫時要保密。」去到尾聲，劉導演忽然宣佈：「啱啱收到消息，齊昕好唔舒服，上咗車都車返轉頭，嚟唔到，行路都有問題。」在場記者即刻問係腳有事定人有事？係咪俾人綁住？導演話：「佢個人有事，呢排佢瞓唔着覺，成日冇瞓覺，精神唔好嚟唔到！」記者質疑部戲可能拍唔成，劉導演好肯定話一定開到。
特首辦：不予置評
查實齊昕都喺有線訪問自爆想入娛樂圈，亦曾自薦做模特兒，估唔到咁快一躍成為女主角。八方噚日喺公開活動兩度問梁振英知唔知道齊昕拍戲，梁當場冇回應；特首辦發言人則對齊昕拍戲表示不予置評。
李八方
mailto:[email protected]