百仁基金會喺三月二十九日第三年搞beHERO Run慈善跑，今年目標籌一百萬，捐款全數撥入「百仁之友」青訓計劃，協助青年生涯規劃拓展視野。上年原定三千個名額爆晒，今年加碼到五千個，仲搵咗高永文、蘇錦樑同張建宗做嘉賓，到時會唔會跑埋一份就未知，不過海事處、入境處、消防處同懲教署四位阿頭應承組隊參加大作戰喇。
八方問過百仁基金主席李文俊，今年針對青年做工夫，係咪受佔中影響？佢就話唔關事，解釋基金一直有做青年工作，佢覺得青年嘅問題唔係覺得機會少，勸大家唔好太集中目標買樓，反而應該專注事業發展，又話青年𠵱家唔係冇機會，只係機會變咗，如果放眼中國，發展機會處處喎。