舊年中港兩地賀歲檔票房成績都好好，搞到今年賀歲檔爭崩頭，香港就有四部華語片《浮華宴》、《衝上雲霄》、《12金鴨》同《賭城風雲II》上映，動畫片較矚目嘅有《多啦A夢3D》、《荒失失企鵝3D》同《超級無敵羊咩咩大電影之咩最勁！》等。
上年《六福》收八千萬
單係睇牌面就應該係叮噹鬥金鴨啦！黃百鳴主演兼監製嘅《浮華宴》羊年大年初一喺香港上映，而內地就提前喺上星期五放映咗啦！但係票房就唔多理想，三日累積票房只得二千四百二十萬人民幣，前日禮拜日單日票房只得五百一十萬人民幣，睇個勢頂多五千萬人民幣就落畫。
黃百鳴幾乎每年都有賀歲片上映，去年就有《六福喜事》，香港票房收約一千八百萬，內地約收八千萬人民幣，但今年以古天樂扮神探作號召嘅《浮華宴》就唔多掂，內地口碑麻麻。睇嚟黃老闆下年再搞賀歲片時真係要花多啲心思，觀眾睇咗咁多年賀歲片，如果你唔諗吓噱頭，真係好難叫佢哋買飛入場。
撰文：馮仁昭