A股不似預期，一月跌，二月第一個禮拜繼續跌。最新跌法更似陰乾，比起一一九暴跌更危險，一一九就係一煲熱水，掟隻青蛙落去灼傷佢，然後即刻彈番起；而家就好似溫水煮蛙咁，每日陰啲陰啲，間中又出吓降準等你以為有好嘢，點知半日玩完。
而家只能睇三樣嘢，第一係農曆年；第二係三月頭兩會；第三係業績。
過年前，中證監終於收緊傘形信託摃捍，呢個被稱為令資金投入股市加大力度推動A股嘅方法，傳咗一輪終於叫停，搞到基金沽定貨先。
加埋中央嚴令孖展門檻五十萬人仔同下星期開股票期權可以造淡，高明一聽，即刻覺得好驚，但諗深一層，呢啲咁不利嘅消息，由咁北傳到我呢啲散到唔散嘅香港散戶，即係好多人已經聽過同埋做咗嘢，應該樂觀啲解讀為壞消息已經消化得七七八八。
所以第一件事農曆年，應該開開心心咁過，唔好畀股市呢啲小問題影響到。
第二件事就係兩會。純粹睇恒指，過去四年，兩會一開，恒指即跌，無論係等一個月，定係短短哋四五日，總會跌一次千點，例如舊年二○一四年，三月頭跌到三月尾，跌成千五點。
買貨取決大牛市
今年市場會對兩會有更大憧憬，因為A股真係炒咗上嚟，改革好似有人信，至少有人落咗注，過完年假搵啲理由炒吓唔出期，但係之前咁多年都係一開會即死，加埋最新降準個市都要跌，中國好消息，都係開獎嗰人畀哂啲貨佢就算。
而第三件事指的是，業績期，相信都會被兩會打低，一係就等三月尾跌晒你先買，一係就選擇完美地同中國脫鈎嘅長和系。最後，再買唔買貨，取決於信唔信A股大牛市。
如果證實A股只係短命種，炒半年就玩完，外圍水源多，要搵嘢去炒，只能返去炒殼股。
舊年炒開嘅殼股靜晒，甚至有啲已經回落到四億元殼價樓下。但由於大價股又冇飯開，個別已經有動靜炒上，例如東南集團（726），升17%報0.35蚊；另外亦有隻遠東控股（036）升一成，暫時監察住呢類殼股，大市唔炒佢哋炒，即係殼股潮又返嚟喇！
高明
https://www.facebook.com/BigRiceTea
本欄逢周一刊出