民主黨黨慶689又下令官員集體杯葛，原因係民主黨要求佢下台，真係幾可笑。特首俾人叫落台，有幾大件事，搞到要下達政治命令，禁止官員出席。呢一招其實又係借題發揮，夾住下邊棚司局長，凸顯出呢個團隊政治「過硬」，仍然受689指揮，充份凸顯出特首政治領導角色。至於這動作，當然並非做畀香港人睇，又係一台神功戲。
689心思都花在批港獨、杯葛反對派等「小學雞式」政治神功戲之中，專門做畀北京領導睇，呢種政治掛帥的敏感度，比前兩任特首高出幾皮，「香港文革」由佢發動，實在不作他人選。在共產黨政治潛規則中，有所謂寧左勿右，政策過左即使事後認為犯錯，因不涉及路線問題，所以冇乜政治代價，但如果犯了右傾錯誤，則問題大了，可能背後有各種動機猜測，是否要否定黨領導、是否有外國勢力幕後影響，諸如此類，醒目仔自然會有咁盡去咁盡，有咁左得咁左，以顯示自己緊隨中央，政治「過硬」。
要突出政治「過硬」，不外乎幾種方法：首先是誇大鬥爭形勢，毛澤東深明此道，借中蘇分裂，國外形勢有變，乘機突出黨內矛盾搞內鬥，一直堅持黨內有修正主義、反革命集團，矛盾扯高，逼人歸邊，以鞏固自己領導角色。而要製造一種陰謀處處氣氛，先可以令尖銳鬥爭形勢似層層，所以就要「警惕」呢樣，「警惕」那樣，製造各種「敵人」。敵人就分內外，由於中共鬥爭歷史是借國際形勢變化過橋，所以必定有「勾結外國勢力」。當然會有其他人知道是誇大其辭，但大家都唔會踢爆，反而會附和，這就是「寧左勿右」的考慮，大家一齊左總好過自己一個右，即使事後知道錯，大家都唔會再提。1966年文化大革命，十年浩劫，正由於人人有份，有咁盡去咁盡，有咁左做咁左，即使十幾年後知錯，最終冇人需要承擔「左毒」的責任。
如今香港左毒終於全面爆發，冇人會出手阻止，傳統親共人士看在眼裏，雖然心知肚明，但至多就選擇唔出聲。至於政務官集團，就更加畏縮，林鄭早已變成二三流政客，事事政治正確為先，如履薄冰，生怕被標籤為「勾結外國勢力」、「與反對派眉來眼去」、有奪位野心。雨傘運動後，正好是689鞏固其政治地位好時機，上次施政報告批港獨，林鄭未有高調附和，仲認為是特首個人意見，企圖保持距離。一計未成又生一計，今次利用民主黨黨慶再次借題發揮，睇吓邊個夠膽逆689意而行。
目前已應承之高永文正式褪軚，表明會跟從集體決定，剩下一個前民主黨人張炳良，表示會出席。估計在689玩權術的把戲下，最終佢亦會跪低。有時，見到呢班昔日泛民中人，加入建制後，不單無力制止這場左禍，甚至成為同謀，陸恭蕙、胡紅玉、張炳良、羅致光、甚至港英政務官出身之政客，大家從政，除咗金錢及權力之外，真係連一丁點價值理念都沒有？
添馬男