立法會主席曾鈺成日前接受佢黨友蔣麗芸嘅網台訪問，講番當年令佢細佬曾德成入獄兩年嘅六七暴動，原來嗰時曾鈺成同家吓啲年輕人一樣，都好唔鍾意亂咁動武嘅警察：「我哋睇到嗰啲防暴隊，同嗰時一樣，催淚彈等，同埋真係打嗰啲工人、真係打示威靜坐嗰啲工人，打得好狼，我哋都好反感。」唔知曾鈺成口中呢句「同嗰時一樣」，係咪指九月二十八日警方使用八十七枚催淚彈呢？
弟入獄 母喊爆
曾鈺成又話，曾德成入獄令佢媽媽「日日匿埋嚟喊」，爸爸亦都好擔心。佢話喺大學討論呢啲時政時，由於佢係支持工人一方，所以都有同啲大學同學爭辯，但係自從曾德成入獄後，所有同學一見到佢，就唔再出聲。曾鈺成話，因為當時啲同學質疑佢屋企背景點解會咁左。
唔少人都支持曾鈺成選特首，但係曾鈺成話佢當年大學畢業後，冇諗過要從政，曾經諗過教一陣書就去美國讀書做研究，然後做科學家貢獻國家，但係最終喺程介明引薦下入咗培僑中學教書，之後由於培僑喺七十年代面對收生不足，決定留守培僑教書，直至轉型從政。