二○一五年二月七日，可能係我球員生涯中最後一場默西賽德郡打吡……
如果大家問我上陣前嘅心情係點，真係好難形容。過去企喺呢條葛迪遜公園球場嘅球員通道上，每次我都只係想快啲行出去，然後喺拖肥糖球迷面前，幫利物浦入波，就算聽到大部份嘅，只係噓聲……但我好享受，我知道呢啲先係打吡戰應有嘅氣氛。
不過，今日嘅我，再企喺呢條熟悉嘅通道，我突然唔想咁快行完，好似行每一步，腦海都會浮現我過去三十二場打吡戰嘅畫面，仲要係逐一播放，當中有喜，亦有悲；但當踏出球場嗰刻，呢段腦入面嘅replay就瞬間停咗，因為一切都已成往事，佢哋會係我心裏一段段美好嘅回憶，但我只係想完成埋呢場最後嘅打吡，有個完美「謝」幕。
羅渣士為伊比拍爛手掌
場波最終0:0互交白卷，當然同我預期有啲落差，因為幫唔到球隊攞走三分，盧卡斯仲不幸傷出，但起碼都幫到球隊保持十四場不敗。對我嚟講，呢場波有好多亮點，而且睇到嘅係紅軍嘅未來，史達寧、艾拔圖摩蘭奴、安利簡恩等等，佢哋比賽時嘅眼神，都充滿住對呢場打吡嘅熱情同渴望，我感受到佢哋好想贏。
當然仲有我近年嘅中場好拍檔佐敦軒達臣，見到佢同賴史密夫喺場上推撞，雖然我要走去拉開佢，但嗰刻我喺度諗：佢一定係第日嘅我！嗯，我呢個隊長臂章，應該要交到佢手上。當然仲有右翼佐敦伊比，估唔到佢第一次喺打吡戰亮相，可以踢得咁出色，好似羅渣士賽後咁講，伊比表現令所有人都拍爛手掌，賽後仲被選為全場最佳；如果夠運，上半場嗰球遠射唔係中柱，我諗今日賽後嘅話題，一定係佢，而唔係我。
離開球場一刻，我有啲唔捨得，但正如之前所講，每一件事都係人生嘅過程，亦總會有一個終點。披頭四嘅一首《In My Life》，就講到喺每個時刻，總會有別離或留低，但我哋永遠會記住呢份愛。我對紅軍同默郡打吡嘅熱愛，永遠唔會磨滅，就算我離隊，但靈魂繼續喺度！
再見了，默西賽德郡打吡！祝願一切繼續精采！
識睇，一定係睇足英台【英波Live】：
http://soccer.appledaily.com
http://bit.ly/engballlive