NBA近排好波連場，上周六又上演一場西岸激戰，主場嘅小馬一度大落後，但最終加時以111:101贏咗拓荒者，全場入二十分嘅前鋒柏臣斯（Chandler Parsons、右）成為贏波英雄。
講起柏臣斯同拓荒者，呢位靚仔射手上季效力火箭嗰陣守唔住尼拉特（Damian Lillard）球超級絕殺，結果輸波而季後賽首圈出局，嗰刻嘅畫面相信大家歷歷在目。今季已經變咗小馬球員嘅佢都未忘記呢個恥辱，可惜第一場作客拓荒者就慘敗，不過上周六返到主場就唔同喇。
第四節初段仲輸緊十六分嘅小馬，憑奴域斯基（Dirk Nowitzki）等球員頻頻跳投得手，加上對面嘅尼拉特最後一擊唔入，結果要打加時。柏臣斯喺加時攻入十分，係拓荒者全隊加埋嘅兩倍，令小馬最終反勝。佢賽後話：「呢場好重要，因為我哋成季都未贏過一隊齊腳嘅強隊；我哋一定要贏多啲好似今場咁嘅比賽。」
古賓撩杜蘭特打1-on-1
另外，一向豪氣嘅小馬班主古賓（Mark Cuban），賽前話想挑雷霆前鋒杜蘭特（Kevin Durant）機！事緣有人質疑季初因傷長唞嘅KD唔值得入選明星賽，佢就霸氣話只要有人打1-on-1贏到佢，就可以攞佢個位；一早公開批評明星賽選人制度嘅古賓，就話自己之前單挑贏過奴域斯基，所以可以贏埋KD喎。
識睇，一定係睇足英台【英波Live】：
http://soccer.appledaily.com
http://bit.ly/engballlive