雖然別了保全叔（林保全），但佢把叮噹（𠵱家叫多啦A夢）嘅聲，我哋永遠記喺心入面。由佢配音嘅電影《STAND BY ME：多啦A夢3D》就快上映，香港Pop-up store推出嘅限量精品，大部份一推出就一掃光，其中只售一百隻嘅限量版1：10木製3D多啦A夢figure（圖），近日有人放上網拍賣，叫價升咗兩倍幾去到差不多五千蚊。
呢隻figure腳底都刻有編號，頸上戴住嘅金色鈴鐺閃閃發光，售一千五百蚊。雖然官方做咗一百二十九隻，但香港只放售一百隻，開售即日被搶購一空。近日唔少人紛紛將呢隻figure放上拍賣網，有啲叫價𠵱家去到三千五百幾蚊喇！唔想同人bid，直接購買價就有人開三千三百八十、三千九百幾，甚至四千九百幾都有。
淘寶網都唔執輸，每隻索價二千九百八十人仔。究竟啲貨係真唔係？我費清就唔敢講喇，你知啦，阿里巴巴主席馬雲都話啦，淘寶係賣「網貨」，唔係假貨嘛！
上面都有寫啦，其實仲有二十九隻figure未推出，官方保留用途，但見咁多fans想帶佢返屋企，決定攞一隻出嚟畀香港嘅fans抽，喺佢哋fb（ https://www.facebook.com/100Doraemon）答中一條問題就可以參加抽獎。
費清 ＃要生計，也要生活 ＃毋忘初衷