亞視賣盤四名白武士曝光，包括萬達集團王健林、遠東發展（035）邱達昌、香港資源（2882）黃英豪及滙友資本（8088）胡景邵。TVB前總經理陳志雲坦白又敢言，接受《蘋果》訪問時直指邱達昌及黃英豪是「人頭」。我Noel就覺得根本四個都是「人頭」。
所謂「人頭」，就是指參與交易的人物，是代表一個（一群）不能或不願曝光的大老闆出手。說白一點，人頭負責「代客泊車」，架車更靚更威，人頭僅是泊車仔一名，並非真正車主。
亞視賣盤呢單刁，十億八億是入場費，仲未計之後每年投入的資本開支，所以都無需要向四人起底，單是好勢利咁講，身家無一百億以上的「買家」，統統只能當係「泊車仔」。亞視四名白武士中，只有身家逾二千億元的王健林，最具買家資格，但係咁，彭博曾經報道國家主席習近平家姐，持有萬達0.8%股權。點知王健林買亞視係咪國家級「泊車」行為先？
「咁有錢都做泊車仔？」可能你會咁問。有錢都分層次，有錢佬幫更有錢人泊車。首富呢？梗係幫權貴泊車，皆因社會食物鏈中，掌權者坐上把位。國家前總理溫家寶三年前被外媒爆家族持有大量平保（2318），泰國首富謝國民豪掟七百億元入股平保。係咪好巧合呢？
做金融「泊車仔」要乜條件？識財技、有人脈就不在話下，不過最重要還是心態，皆因揸住靚車招搖過市得多，「泊車仔」要時刻記住不要喧賓奪主，但也不能在大眾露底，份工唔易做。
何淑茵
mailto:[email protected]