安樂窩嘅定義人人唔同，有人想要三房一廳，亦有人會話最想有無敵海景，但好少聽到有人話屋企最好有半個浴缸或者車位咁大嘅客廳。現實總是殘酷的，香港同日本嘅無殼蝸牛，原來想上樓一樣咁難。
受安倍經濟學推波助瀾下，日圓貶值同息率低，令日本樓價升得好瘋狂。有報道講，舊年日本樓市成交額突破五萬億日圓大關，折合三千幾億港紙，係七年以來最勁。海外企業同基金比散戶更積極入市，成交勁增三倍，佔整體市場交易額約兩成。日本同香港樓市幾近似，畀外國勢力炒起。東京都杉並區內新盤，當地發展商為咗定價係六千萬日圓左右，諗盡辦法將單位縮細，務求單位面積喺六百五十呎之內。為咗保留三房一廳間格，發展商決定將客廳縮細到一個車位咁大。
一個車位係大係細，真係You諗You喇！但呢類單位未能提起日本人嘅置業興趣。另一方面，日本工資停滯不前，亦令無殼蝸牛難上車。舊年十二月日本家庭收入按年升2.1%，扣除通脹變動後，實際工資增長跌0.8%。日本人想買個安樂窩寧願去近郊，情況就似我哋香港人買唔起市區樓，要去新界地區搵盤。日本國土交通省統計數據話，東京樓價指數喺海嘯後至今越升越有，由九十水平升見一百十一樓上。相信癲價細樓，去到地球邊一個角落，唔會係民眾所求。
C+B
本欄逢周一刊出