香港人最留意「超人」李嘉誠嘅一舉一動，事關佢甚少做錯投資決定，即使海外3G業務連年蝕錢，守咗十幾年都見曙光。相反，美國股神畢菲特原來周不時有啲令佢揼心嘅投資決定，證明股神不過也是人。
股神近年呻過幾次，好似英國連鎖超市Tesco，佢曾經係第四大投資者，但截至舊年第三季，Tesco股價蒸發一半，股神減持後，埋單蝕近七億美元，事後佢承認投資Tesco係一大錯誤。
講近啲，迪士尼上季因一套《魔雪奇緣》大賺，股價節節上升，原來股神早喺一九六六年曾以四百萬美元買入5%迪士尼股份，翌年以六百萬美元悉售。
當年佢以為賺二百萬美元好叻仔，估唔到迪士尼上周五市值逾一千七百億美元，5%等於八十五億美元，股神真係揼到心碎，華華唯有送首《Let it go》畀佢喇。