梁振英政府為急於成立創新科技局，大玩政治手法，將送交立法會通過嘅撥款議程，隨意修改動手腳，抽起其他項目，係要財委會提前討論撥款成立創新科技局。泛民議員就擺明對人不對事，凡係梁振英所急的，就會拉布、阻止、拖延，一於烏蠅嬲馬尾，一拍兩散。散乜嘢呀？咪係民望囉，據鍾庭耀嘅民意調查，泛民議員民望下跌，最高民望嘅議員係曾鈺成第一，葉劉淑儀第二，譚耀宗第三，全是建制派議員。左丁山見到鍾庭耀，同佢開玩笑：「呢輪愛國報紙會惜晒你啦，唔會鬧你亂作民意！」鍾博士笑笑口回答：「或者人地認為曾葉譚三位嘅民望應該更高啲呢！」
創科局呢樣嘢，根本源出於「政府勝市場」嘅心態，利世民等人應該大力反對，過去管過科技嘅王永平亦為文反對。奇怪嘅係，竟然有人認為不成立創科局就係損害中產，傷害青年前途，都唔知出於甚麼邏輯，只能講有此意見的評論係「干預一派」，以為政府可指揮、操控工業、新科技發展。美國創新科技層出不窮，領導全球，青年創業家無數（雖則成功者只係極少數），但美國何來有一個創新科技部？點只咁呀，亞洲國家好時興嘅經濟部，美國都冇呀，一個財政部，一個商務部，就負責晒美國嘅金融、商業、工業、貿易及科技政策。微軟打垮IBM電腦部，蘋果超越微軟，Google撼低雅虎，fb異軍突起稱霸，起初從無到有，從有到稱霸全球，幾曾由美國政府扶助過，栽培過？葉劉淑儀經常以留學史丹福自豪，住過矽谷，回港後成日講科技發展與科技政策，幾令人懷疑佢在矽谷所見所聞是否受到誤導。
增設一個創科局，只會增加不少高官職位等不少人領取高薪，搵納稅人笨，泛民如果拉布成功，阻止創科局成立，對香港有利無害。至於梁振英暫時犧牲漁業基金之撥款（十億元），相信就冇乜市民反對噃。撥款十億，根本就係明益極少數人，以泰國黃衫軍批評他信及英祿嘅語言，根本就係「買票行為（vote buying）」，因為漁農業對香港GDP貢獻少之又少（0.04%），但在選委會竟然有36席（佔總數3%），而呢批人每逢投票必定一致擁護建制派候選人嘅。