特首夫人梁唐青儀同佢嘅女梁齊昕可謂惹火人物，所到之處總會吸引注視。話說有位姓陳嘅市民，前晚喺機場停泊旅遊巴士專用線嘅禁區，見到有架掛上AM車牌嘅政府車停喺度，睇真啲就見到疑似CY老婆同佢呢期紅到爆嘅囡囡齊昕落車。呢位陳生質疑點解呢架AM政府車可以停泊喺旅遊巴士專用線，是否享有特權？又質疑特首夫人點解唔用特首專車；既然唔係出席公務場合，點解又可以用政府專用車呢？
謝瑞麟高層踢爆
八方向特首辦查證，特首辦證實特首夫人前日傍晚，曾經坐專車前往機場，該車領有禁區許可證，在有需要時可在禁區上落客。特首辦又話特首夫人獲安排政府專車及司機在任何時候使用。根據特首辦嘅回應，即係只要特首夫人需要，無論係咪公務抑或私務都可以用政府專車。
不過立法會議員就唔係咁睇，范國威就話梁太應知所進退，「你有權咁做，但唔代表你應該咁做」，又話除非緊急情況，否則唔應該隨便用政府車，「𠵱家件事俾市民覺得你濫用政府資源，影響形象，何況禁區上落客會影響其他人嘅使用同安全」。
八方又八到揭發事件嘅呢位姓陳市民身份大有來頭，佢係謝瑞麟珠寶首席營運總監陳立業，被傳媒冠以「商界橋王」、「奇蹟創造者」等稱號，佢未夠三十歲已成為香港電訊界最年輕嘅總經理，又做過香港星展銀行及香港旅遊發展局，八方噚日嘗試搵陳立業問佢對特首辦嘅答覆收唔收貨，但截稿前都未回覆八方。
李八方
mailto:[email protected]