皇家馬德里上周六喺馬德里打吡，爆冷慘敗0:4，係二十七年來最大嘅打吡大敗，賽前真係冇人會估到呢個結局，而且仲要係輸得心服口服，因為對手馬德里體育會全場都壓住皇馬嚟攻，而皇馬全場只得一次射中框，停賽兩場復出嘅基斯坦奴朗拿度（C朗），更加踢到冇晒影，難怪一向係好好先生嘅皇馬教頭安察洛堤，賽後都忍唔住鬧班球員冇個踢得好，仲話今場係佢上任以來，最羞恥嘅敗仗。
不過，大敗似乎無損皇馬班球員嘅心情，賽後已經急急腳趕住參加C朗嘅三十歲大壽派對，仲即場大展歌喉㖭（小圖）。原本二月五日生日嘅C朗，係想喺擊敗馬體會後，順便當埋祝捷會，點知𠵱家搞成咁，有網民鬧佢哋點解仲有心情慶祝。不過我求大俠覺得無謂諗太多，最多玩完再檢討囉！好似C朗賽後咁講，球隊大敗完都仲係榜首，仍然好有信心奪冠，你哋可以吹得佢脹咩？
識睇，一定係睇足英台【英波Live】：
http://soccer.appledaily.com
http://bit.ly/engballlive