上禮拜四晚，中紀委揭曉首批被巡視央企問題清單，有啲衰嘢已經見慣不怪，例如話聯通（762）母公司高層搞權色交易、東風集團（489）母公司高層公款吃喝等。不過，報告中揭露，有神華（1088）母公司神華集團高層勾結私人老闆，搵人點火燒煤田，再謊報滅火工程謀取暴利，恐怕係全球能源開採史上的一大奇聞。國企高層要貪起上來，膽大包天，實在令人歎為觀止。
暫時未知，被縱火煤田是否屬於上市公司資產。不過，根據中紀委報告，成個神華集團似乎好大問題，除燒煤田外，成間公司管理混亂、高層謀取腐敗黑金，直指「有較大腐敗風險」，措辭之嚴厲非常罕見。
神華上市公司前年發佈《社會責任報告》，一百一十八頁報告內容，歷數公司在環保、廉政、安全方面的成績，上上下下有幾十個委員會，嚴格貫徹執行問責。仲夠膽死話，「報告期內未發生腐敗訴訟案件」。
中紀委所揭露的實情，與上述吹噓差天共地。最震撼係踢爆有高層勾結外人燒煤田，然後唔搵公司消防隊，搵街外承包商呃錢。唔單止造成資源浪費同無謂經濟損失，嚴重破壞環境，簡直罪孽深重。神華咁仲好意思出《社會責任報告》，真係冇眼睇。
李可強