上周港股主調係轉弱，恒指向上爬之阻力重重，見到唔少大價股舉步維艱，估計大市升極有限，於是周三short了call，等收期權金。可是人行周三收市後突宣佈降低主要金融機構存款準備金率0.5%至19.5%，夜期買盤湧進即夾四、五百點。我收到消息後立即揸期指對沖short call，但還是要輸200點以上。
翌日港股高開後，立即走軟，周五更差不多打回原形，走勢同先前預測一模一樣，但一段急升變得賠了夫人又折兵，損失主要來自揀錯投資工具，在近日這些飄忽政策市，short期權有機會入了價，所以暫時或減少沽期權，收期權金的打法。唔少人認為，人行降準代表貨幣政策將會放寬，利好兩地股市。
萬達院線十一個裂口
然而市場人士估計，這次降準最多只能釋放流動性約七千億元（人民幣．下同），下周預計會有二十四間公司招股集資約一百五十一億元。而內地證券行估計，新股將會凍結一萬六千億至二萬二千億元資金，故七千億元幫到個市幾多？我就不太看好，周四趁港股高開，沽出部份正股減磅。
講開新股，經常於十大富豪榜上有名的王健林又有喜事，旗下萬達院線於深圳上市，招股價為21.35元，經過連續十二天漲停牌後，股價收報八十七元，升三倍多。而幅圖又畫到非常罕見，因內地每個交易日最高漲幅為10%，除掛牌上市首天外，每日股價都是開市價等於收市價，並留下十一個完整的裂口，好似一級級樓梯向上走。但終點會係幾多錢呢？
雖然萬達院線有母公司萬達集團做後盾，又拍住iMax開戲院，更有自家製作電影，係一隻綜合娛樂概念股，但二○一四年上半年盈利升三成後，仍只有4.2億元，若下半年賺取金額相同，現時預測市盈率高達158.3倍。巨無霸上升，亦帶動本地上市的同行國藝娛樂（8228）上升，這兩周升近一倍，市盈率未能計算，因暫時盈利未有，雖然係咁又係創仔，我都細注照追，算做參與止蝕欠奉，純屬賭博的A股化新常態。
中港股市融合現時非常混亂，但新秩序亦正在形成。戰友留意到，中證監逢周五晚收市後都會出來交代最新工作進度，例如一月十七日交代證券行的調查報告，同時公佈幾家大型行要停收新孖展客三個月，釀成一．一九慘劇。戰友話，應該係內地股市的孖展餘額升得太快，搞到內地資本賬改革未完成，就已經炒爆股市，到時乜嘢改革都唔使再搞住。
所以今期每個周五收市前，都可以望吓個孖展餘額有沒有爆升，如果有嘅話，可以買啲put博吓中證監出唔出手，反正A股化主題之一就係「人為市」，偷襲時時有，就算唔出手，大勢向下，博put一日半日輸晒有限。這周五做法在未來幾個星期都應該會生效，係時候運用新常態，打下反擊！
張士佳
註：筆者持有國藝娛樂