有日，鄭兆聰突然有感而發，話佢踢波乜都試過，係得一個小遺憾，就係無衝出香港去外國踢波！原來佢當年當打之時，有朋友想介紹佢去英國球會試腳，但佢唔捨得走，就貿貿然放棄咗𠵱個機會，到今日都覺得有啲可惜。
「邊間球會咁有眼光呀？」「細球會，韋斯咸！」「咁又唔使太可惜嘅，試腳又唔代表人哋會揀你嘅！」我只能咁樣安慰佢。
周中香港又有球壇新星得到衝出去嘅機會，上網睇到有人post許宏鋒同霍斌仁出外踢波嘅新聞，識睇梗係睇留言，其中一個寫得幾有啟發性 : 出咗去唔好返嚟啦！第一眼睇以為係監獄戲嘅對白，咁出面大把世界，行出去確係好多發展，之但係我哋個地頭好似監獄咩？有人想無限期旅行，有人想快快手移民，走係咪最好方法，人人有唔同答案，但想衝出去成為咗唔少朋友仔嘅目標，留學固然好，working visa亦成為告別二字頭嘅儀式，但我認為最有型嘅方法，莫過於以運動員身份衝出世界。而從宏觀啲嚟睇，最有機會殺出海外嘅項目，就係足球！足球員𠵱個名堂俾人擺埋一邊咁耐，終於有機會可以upgrade嘞。點upgrade法？就係如果你好波，你就擁有一項專業技能，可以去邊個國家搵食都得！
各位家長，以往過年過節成日要諗帶小朋友遊埠出去玩，有波踢就唔使煩，阿仔啱啱學踢波嘅，又想學好外語同群體生活，咁就要報出埠踢波summer course嘞，朝早唔使你叫都識自動起身。好波啲嘅，細細個都已經有海外比賽，香港隊U16喺國內五人賽爭入決賽，見識肯定多過齋吃喝玩樂團啦。
遠在葡萄牙嘅歐冲（圖） 亦傳來好消息，上周佢終於入選葡甲球隊出場名單，距離登上歐洲聯賽又近一步，最開心嘅係見到佢字裏行間充滿朝氣。足球世界無一步登天，但你哋嘅一小步，其實係為香港波嘅下一代，開拓新出路。
KEYMAN
節目主持
電郵：mailto:[email protected]