【本報訊】新界東北發展大興土木，有人哀悼，有人期盼，同樣在鄉村長大生活的她，卻選擇以畫筆記錄消失中的鄉村，「每次搬村，死得最多嘅一定係動物」。為荒廢鐵皮屋畫壁畫，花貓唐狗山羊，但短短一年，拆剩廢鐵，「好多嘢都唔等人」。
記者：呂麗嬋
「你怕狗嗎？」走進李香蘭位於沙田下禾輋的家，剛踏入門口，她就煞有介事的問。皆因她家有三貓一儍狗，一開閘，似速龍，九秒九親吻你嘴臉，熱情澎湃，「我哋屋企，培訓唔出有紀律嘅生物」。戴着闊邊紅帽一身闊袍大袖的小妮子，自嘲似的在解畫。家訪李香蘭，很懷舊，依山而建的百呎小石屋，住上三代，屋前小片空地開了張摺枱，公公在屋內向你揮手，媽媽奉茶，閒話家常。
依附在都市一隅的老寮屋區，買少見少。感同身受，無怪新界東北發展，她感受最深，是首批走進馬屎埔村聲援的創作人，義務主持工作坊、協助美化鐵皮屋，為小鄉村作另類紀錄。「有間鐵皮屋就近村口，無人住，只有貓喺度聚居」。馬屎埔有三寶，通山走的貓狗，還有山羊。「想畫晒村入面所有動物，喺鐵皮上面畫咗唐狗阿旺同貓仙人，另一邊就畫羊咩咩。」
「鐵皮畫」大功告成，只是沒一年，鐵皮屋拆了，剩下廢鐵，李香蘭說，讓她想起自小陪伴她成長的木棉樹。「有成八米高，就喺屋企附近，細細個就好鍾意睇木棉花飄落，有日工人斬走咗，樹膠流滿一地，原來只係因為有工程，嗰度要放機器」。以為總在那裏，但一覺醒來，已在風中。不能抓在手心，她說只好努力做紀錄，圖文繪本《上．下禾輋》由是誕生。
做了一輩子沙河粉的夫妻、守着小店的上海理髮師傅，還有鄉村獨有的捉鼠天王。小妮子筆下的世界，盡是鼻孔朝天的販夫走卒，卻又異常親切，「喺瀝源街市，有間舖竟然貼咗啲畫出嚟；最好笑係試過有個石油氣阿叔，跟住書嘅地圖，嚟咗我屋企，坐喺客廳等我」。走進小街小巷，利用教畫以外的公餘時間，尋訪別人忽略了的小故事，哪管人微言輕，她有話要說。
用三年出版插畫書
「打開報紙雜誌，啲人唔係好有錢、好靚，就係好有成就，係咪只有呢啲人，先值得關注？」她又花了三年時間，出版另一本插畫書《尋人啟事》，由愛看大媽跳舞的輪椅老伯，到隨身有本《李小龍傳》的建築師，都有個小故事。「細個，已經好想倒晒人哋個袋啲嘢出嚟研究」。原名梁曉文的李香蘭，大學讀設計和電影，畢了業才發現，受制於市場的創作，不算創作，惟有手中的畫筆，最自由。
「𠵱家教吓畫，收入未必好穩定，起碼搞掂自己，仲可以畀少少家用，支持自己做鍾意嘅嘢」。三年出一本書，別的作者或因「精益求精」，她就直言因為要半工畫，分身乏術，「畢業第一年，只有廿二、三歲，可以全職留喺屋企畫畫，完成埋本書先算，𠵱家多咗顧慮，但我仍然相信，就算喺香港，都可以有唔同嘅生活方式」。自言不再年輕，但其實只有廿八歲的小妮子如是說。
